LEMCHANNA KHAWVEL

Infiamna chi hrang hrang zingah hian tleirawl leh naupang lamin an lawm leh TV show ah pawh hmuhnawm an tih pawltak chu Wrestling hi a ni awm e. Hlauhawm leh rapthlak tak angin lang mahse an insawpdan leh kut an inthlak dan zawng zawng hi chu a tak tak a ni veklo tih hi chu kan hrereng mai. Vai film-a inhnek thelh an uar em avanga entha peihlo tak takte pawh hian wrestling hi chu a lem tamtak a awm a ni tih hrereng chung pawhin hmuhnawm kan ti em em a, kanlo inseh ruh ve a, John Cena te folding chair a an han vuak te phei chuan kanlo phu ve zawk zawk thei anih hi.

Wrestler te hi an pian a thain mizo tawng takin an sek hlawm em em mai a, Rey Misterio tihloh phei hi chu ft 6 rual thau an ni mai si a, kawrhlipa an han kalkhawm ringawt mai pawh hi an hmuhnawm tham a, mipa nisi hnute bawr an han ti phu hlurh hlurh maite hi a puive hranpa hrim hrim bawk ani. Nasa leh uluk taka zir leh zirtir (trained) an ni a, an fitness an thain han natder te leh invawrh kan te hi an hnehsawh em em a, lemchang thiam nihna leh infiammi nihna hi an neikawp a niber mai. Thiantha leh inkawm ngeih tak tak te pawh infiamna dawhsan (ring) chhungah inkawk sawk sawkin an han invau der vel a, invauna tawngkam te lah hi ziahsaktu an awm emaw tih mai tur in an thiam em em mai bawk a ni. England-ah te chuan kawrtawp lam alo nih chuan Football khelmualah mi an khat luih luih thin a, Pheonix-ah te chuan Wrestling khelhna ring leh a chhehvelte chu nula, tlangval, pitar leh putar te (naupangte pawh an tel tho) ho authawmin alo ri nuaih nuaih reng mai bawk ani.

March thlatir kha ni awm e, tlai khat chu Ten Sport channel ka han hmet a, April ni 4 a an khelhtur Wrestlemania, (wrestling game ah chuan an ngaihhlut em em) atan khelhpui turin Shawn Michael (HBK) chuan wrestler tihbaiawm leh rothap, huhang nei turu ber pawl Undertaker chu alo cho nasa mai a, chu a chona chu pawm hram turin a han ngen a. chutah mi tawngtamlo Undertaker chuan a han Yes chiah chu mipui authawm a nasa ngei mai. Anni pahnih hi wrestlemania ah hian lo intum tawhin, chu an inkhelh chu mi tamtak pheichuan ‘the greatest match’ te pawh anlo ti hial tawh nghe nghe a, tun tuma an inbei leh tur pawh hi wrestling ngaina tute chuan an nghakhlel hle ani. Shawn Michael a chu hlawhtling inti takin a kal a ring a chhuahsan hma chuan Undertaker chuan, ‘mahse thil pakhat kan dah ang, ka hneh che chuan I wrestling khawvel hi a atawp tawh ang’ a ti ta tlat mai a, HBK tan pawh chu choletna chu pawmloh theih a ni talo.

April ni 4 a loni a, an inbei ta chu a pui ngei mai. Mahse a chotu leh ngam em em tu ShawnMichael chu a tlawm zawkah a tang ta tlat mai. Keipawhin kan fellowship na inah kalo enve a, ka ngui ve ruih theimai.Shawn Michael hi Kristian thatak a nih thu Pu Biakthansanga Khiangte in (Makedonia-ah nita in ka hria) a ziah kalo chhiar ve tawh a, ta tang khan ka tan ve ta riau a, chutia wrestling khawvel atanga nawr chhuah a nita mai chu kalo tuar ve deuh rauh nih chu!!

April ni 14 tlai ah khan Ten Sport channel ka han hmet leh chu Shawn Michael chuan mittuitla zawih zawih in thlahna thu alo sawi a, a entu mipuiten ‘thank you Shawn’ ti a alo lawm in ‘HBK Forever’ tih te chu lianpui puiin anlo tar kiau kuau a. Mi tamtak pawh an hnuk a ulh ve ani. A awm tho e, keini pawhin kum khat kan awmna hostel pawh mittui nenlo chuan kan chhuahsan theilo fo alawm tiru…

Hlauh neilo mi huaisen, tap ve tur pawha mawilo, piantha leh tuan rang, tuarchhel bawk si, Shawn Michael chuan Kum 17 chhungzet alo chenchilh leh eizawnnana alo hman tawh Wrestling khawvel chu a chawlhsan ve alo ngai dawn ta ani. A thiante leh a fans hote hnenah lawmthu a sawi mawlh mawlh a, a thusawi tih tawpnan chuan, “Min chhandamtu ka Lalpa Isua hnenah min chhandamna leh nunna minpek avangin lawmthu ka sawi a ni, HBK Shawn Michael-a hian Nunna In (life building) a nei tawh ani” an ti mai chu, keimah tiamin entu mipuite chu an lawmin hnuk a ulh teuh thei mai. Tunah chuan Pu Biakthansanga sawi leh ziah vang pawh ni tawhlovin Shawn Michael-a hi Kristian thatak alo ni tih chu ka mitin ka hmu a, ka bengin ka hre veta a ni. A thusawi chuan ka thinlungah thu asawi nasa em a, he article hi ka ziak ta ani.

Lal Isua hming lamve na tur awm pawh a kan rinloh Wrestling Ring chhungah mah miropui Shawn Michaela ten Lal Isua an hmangaih leh an chhandamtu a nihzia an puang ngam a ni a, TKP member te hian Engpawh tiin kan eizawnna leh hnathawh te chu eng hna pawh lo nise, Lal Isua min chhandamna hi zahpui lovang u. Kan puangin kan nunpui ngam ve zawk tur a ni dawn lawm ni…

A tawpnan, Ni, Khawvel hi chu ‘Lemchanna Khawvel’ anlo ti banglo a, alo dik ngei a nih chuan, entlak loh leh infiamna bawlhhlawha mi tamtak ten an ngaih Wrestling ang lemchanna tal hi ni theise ka duhleh tlatmai. Anni chuan an huat miahloh te pawh hua leh an hmelma ber ni awmin an lantir der mai mai zawk a, chhungrilah chuan an inkawm ngeihin an in hmangaih hle si a, Keini chu kan huatzawng te bulah kan han nui lui vel a, thinlung a nui theider silo, rilru na leh hliam thuk tak, ser nung kan pairengmai zawk a nih hi. Wrestler ten chhungrila in hmangaihna thuk tak nei chunga lem an chang thin ang hian keini Thalai Kristian te pawh hian hmangaihna nei chunga kan hringnun rahbi chhiarin, ‘Damchhung nite chhiardan min zirtir rawh, finna thinlung kan neih phah hialna turin’ tiin Lalpa henah inhlan thar leh ila, hmalam panin ke I pen zel ang u.